كيفاه نظم الساعة البيولوجيّة في بدني؟
الساعة البيولوجيّة هي ساعة داخليّة تتحكّم في المخ وتخدم على مدار 24 ساعة وهي اللي تتحكم في الوقت اللي نفيقوا مالنوم.
تتأثر الساعة البيولوجيّة بالضوء والظلام على هاذاكا كيف يطيح الليل، العين تبعث إشارة للمخ ووقتها المخ يبعث إشارة للجسم بش يخرج مادّة الميلاتونين اللي تخلّي البدن يتعب وبعد يرقد.
فما أشخاص يعانيو من اضطراب الساعة البيولوجيّة لبرشا أسباب مختلفة كيما الحمل،يبداو يخدموا بالليل،اختلاف التوقيت بسبب السفر. وهذا اللي يخليهم يحبوا يرقدوا في النهار ويسهروا لوقت متأخر في الليل يستناو ينعسوا.
وفي دراسة عملتها “جامعة كاليفورنيا” في 2021 لقاو اللي اضطراب الساعة البيولوجيّة يساهم في أمراض كيما السكر والسرطان.
هاذم بعض النصائح اللي يعاونوك كان ساعتك البيولوجيّة مضطربة.
تغيير الروتين
لازم تبدّل نمط الحياة اللي تعيشوا بش تخفّف مالاضطرابات :
-تعمل مواعيد يوميّة محدّدة ترقد فيهم بش مخك وبدنك يتعودوا.
-تتجنّب القيلولة.
-تمارس الرياضة يوميّا بش بدنك يعمل مجهود وتلقى روحك وقت النوم مخك مستعدّ.
-تبعد على الكافيين قدر الإمكان خاطر تخلي مخك فايق.
-تتحكم في العوامل الخارجيّة اللي دايرة بيك كيما الضو والحس وتبعد على التلفون قبل النوم على خاطر
تقول دراسة لباحثين عملتها جامعة “بيتسبيرغ” اللي استخدام الهواتف الذكيّة في الليل من أبرز أسباب خلل الساعة البيولوجيّة واضطرابات النوم.
-أما بالنسبة للأشخاص اللي يجيهم النعاس بكري فبالعكس لازم يخليو رواحهم عرضة أكثر للضوء وللحس.
ماكلة معيّنة
نشرت “مجلة سايانس” دراسة علمية قالت فيها اللي كيف تختار ماكلة معيّنة تنجم تساهم في ضبط ساعة الجسم البيولوجية.
والمعادن اللي تعاون هي المغنيسيوم والبوتاسيوم والكالسيوم، وين تنجم تاكل قبل النوم لوز، بنان ، كأس حليب دافئ واللي ينجموا يكونوا في شكل كوكتال على خاطر يعاونوا إنو الجسم يسترخي أكثر.
وكيف نحكيو على الأعشاب، نلقاو الي الرند في كأس ماء دافي قبل النوم يعاون على النعاس.
رانية رزيڨ
