كيفاه تنجم تخدم تحت الضغط؟

من المهارات اللي يطلبوها أصحاب المؤسسات كيف ينتدبوا شخص جديد هي إنو يعرف كيفاه يخدم ويتعامل مع المحيط في وقت الضغط. حسب المركز الألماني لبحوث الصحة البيئية وكلية الطب في جامعة “ميونيخ” التقنية، فإنو ضغط العمل ينجم يضعف إمكانية الإصابة بأمراض القلب. وانت إذا كنت تخدم في بيئة فيها برشا ضغط وديما عندك مواعيد بش تسلّم فيها خدمتك وهذا يخليك متوترّ، هاذم بعض النصائح بش تنجم إنك تخفّف من الضغط ومتتأثرش خدمتك.

كون هادئ

أهم حاجة إنك متفقدش أعصابك وقت الضغط، على خاطر هذا ينجمّ يأثر على تركيزك ويخليك تفقد القدرة على العمل وتتشتت أفكارك. وزيد وقت إنت تفقد توازنك وتتغشش هذا ينجم يأثر على زملائك وعلى العمل متاعهم وهكا يولي العمل توكسيك.

أطلب المساعدة

وقت اللي تحس إنو إنت معندكش حل لمشكلة معيّنة أو إنك إنت معندكش وقت بش تكمل مهمّة ما ،من الطبيعي إنك تطلب زميلك/تك بش ي/تعاونك. الطريقة هاذي تخفف عليك الضغط خاطر تولي مرتاح نفسيا وقت تعرف إنو فما شخص من محيطك ينجمّ يعاونك.

خوذ وقت راحة

العمل مهم ، أما مهم زادة وقت تحس روحك مضغوط برشا إنك ترتاح شويا وتاخو مسافة من الموضوع.

وقتها تنجم تفكّر بالصحيح وتجدّد طاقتك وترجع بأفكار وحلول جديدة. وهنا نحكيو على تقنية “البومودورو” واللي هي كلمة إيطاليّة، الطريقة هاذي لإدارة الوقت وتتمثّل في تقسيم وقت العمل وين تفصل بيناتهم فترات للراحة بش تحسّن من التركيز.