كيفاش تتجاوز الكآبة النفسيّة بعد الولادة؟
الـ baby blues أو ما يسمى بالكابة النفسية بعد الولادة هي حالة من عدم الاستقرار النفسي والشعور الفجئي بالخوف و القلق الكبير الي” يلازم الأم من 2 ل 8 أسابيع بعد الولادة حسب اليونيسف “و عادة يكون الشعور هذا من غير حتى سبب واضح .
10 بالمائة من النساء في العالم تعاني من اكتئاب في فترة الحبالة وتوصل النسبة لحدود 13 بالمائة بعد الولادة
منظمة الصحة العالمية
أعراض الbaby blues
- معادش تنجم تركز برشا
- نومها متقطع حتى كيف يبدا صغيرها راقد
- ديما تاعبة و تحس بنقص في الطاقة
- نقص الثقة في روحها و احترامها لذاتها
- نقص في الشهية و الا زيادة فاها
- الرغبة في البكاء
- الاحساس بالذنب و لوم النفس
- تميل ديما بش تقعد وحدها و الا في بلاصة ظلام
في الدول النامية ترتفع النسبة ل16 بالمائة في فترة الحبالة و توصل ل20 بالمائة بعد الولادة
منظمة الصحة العالمية
شنية ينجم ينتج على الأعراض هذوما
ينجم يكثر القلق بالأم ويوصل باها لدرجة انو تحب تولي تنعزل على ولدها وعلى شريك حياتها و يجيها نوع من الشعور بالخوف الي يخلاها ديما تحس الي ماهيش متحملة المسؤولية كيما يلزم.
القلق هذا ينجم يدخل الأم لحالة من الهوس الي يخلاها تخمم في أفكار خايبة لدرجة انو توصل تضر صغيرها.
حسب “الكلية الملكية للأطباء النفسيين “فانه في حالات نادرة الأم الي تعاني من اكتئاب بعد الولادة تنجم تضر صغيرها نتيجة تفكيرها الزايد و خوفها الكبير من انو تصير حاجة خايبة.
كيفاش تنجم تتوقى من الbaby blues
من المهم انو الام في فترة الحبالة تكون مطلعة و تحاول انها تقرا و تسأل طبيبها الخاص على أي موضوع و الا تساؤل يجيها على الحاجات الي ينجمو يصيرولها بعد الولادة و الأهم انو متهملش الأعراض اذا كان ظهرو علاها على خاطر قد متتعالج على بكري قد مايكون افضل.
رحمة القارصي
