علاش ناس بكري موشمين؟
الوشم الامازيغي, تاريخ مطبوع على أجسام أجدادنا بأشكال متنوعة وفي بلايص مختلفة . أكيد كل شخص فينا عندو حد في العايلة موشم أو صادف أنو شاف راجل والا مرأة كبيرة موشمين, أما مانعرفوش علاش. هذا اللي تفسرهولنا ضيفة “أنجح تونسية” منال المهدواني اللي رجعت بحثت في تاريخ الوشم واختارات ترجع الحياة للوشم الامازيغي.
1) وظيفة الوشم الامازيغي:
الوشم قبل كان ليه برشا استعمالات حسب معتقدات ناس بكري و كانت اشكال وأماكن الوشمة هي اللي تحدد الغاية منو:
- التزين: كان الوشم وسيلة تزين, أي طفلة في سن البلوغ تعمل الوشم في وجها باش يزين ملامحها كيما كان يدل على البذخ على خاطر الوشم كان غالي.
- المداواة: كيف حد يتضرب مثلا, كانو يجرحو البلاصة ويوشمو عليها. في اعتقادهم أنهم يخرجو في الدم الفاسد وينظفو في البلاصة. كيف كيف كانو يوشمو على البلايص اللي فيهم برد أو كسور باش يبراو.
- للحماية: الوشم كانو يستعملوه للحماية من العين أو الحسد وحماية الاطفال من الضياع زادة, كانو يعملو الوشم للصغار باش ينجمو يميزوهم في حال ضاعو.
2) أنواع الوشم:
الوشم في تونس تربط بالامازيغيين, لكنو عادة قديمة برشا في العالم الكل وموجود في برشا ثقافات أخرى كيما العرب, الأمريكيين الاصليين, الأوروبيين والافارقة جنوب الصحراء. وحتى في تونس نلقاو أشكال وشم ورموز مميزة لكل جهة مثلا أوشام الساحل موش كيما أوشام الجنوب والشمال.
باش تعرفو أكثر تفاصيل على الوشم, تفرجو في الفيديو.
سارة البلومي