عطلة للنساء أثناء الدورة الشهرية
لأول مرّة في أوروبا، البرلمان الإسباني يصادق على قانون “إجازة الدورة الشهرية” للنساء اللي يعانيو من آلام الفترة هاذي في 16 فيفري 2023.
ويعطي الحق القانون للنساء بش ياخذو عطلة مدّتها 3 أيام وتنجم تعمل تمديد بنهارين أخرين حسب موقع “أورونيوز”.
أثناء الدورة الشهرية كيف تطيح بطانة الرحم، من الطبيعي إنو تعاني المرأة من آلام وتقلصات في الجزء السفلي من البطن. وساعات، يصيرو الوجايع في أسفل الظهر وأعلى الساقين.
موقع “بانادول”‘
الدول مستعرفش بالعطلة هاذي للنساء خاطر في المخيلة متاع الناس إنو المرأة الفترة هاذيكا تتدلل وإنو الهرمونات هي اللي تتحكم فيها و ما فماش وجايع لا حتى شيء.
الدورة الشهرية مهيش دلال
نورشان شقني قابلة وأخصائية في الصحة الإنجابيّة حكات لإنجح في نفس السياق هذا اللي الدورة الشهرية مهيش دلال واللي فما ناس يوصلو لمرحلة وجايع قويّة تخليهم يستحقوا راحة واللي مش النساء الكل يكون عندهم نفس الآلام. في الفترة هاذي المرأة تستحق فقط شكون يفهمها ويراعيها نفسنيا خاطر مزاجها يولي متقلب وأي حاجة تبكيها.
فسرتلنا نورشان شنوا الأسباب العلميّة اللي يخليو المرا المزاج متاعها يتقلب وتولي تنفعل فيسع.
‘الدورة متاع المرأة بين 28 يوم و 36 يوم وتتقسم لزوز مراحل الأولى، المرحلة الجرابية والثانية المرحلة الصفرية
وفي وسط المراحل الزوز تجي مرحلة التبويض اللي فيها تكون البويضة حاضرة تخرج مالمبيض
وتمشي لقنوات الفالوب وتقعد غادي تستنى حتى يصير الإخصاب متاعها وتصير حبالة.
وفي حالة ميصيرش إخصاب متاع بويضة وقتها نوليو نحكيو على دورة شهرية.
وفي فترة التبويض عنا زوز هرمونات مهمينة : الاستروجين والبروستوجين.
الزوز هرمونات الأنثويّة أساس كل شي وبرشا نساء فترة التبويض تقولك حسيت آلام وإلا حسيت عندي نزيف صغير
وتبدا خايفة وتقول زعمة شنوا اللي صاير في بدني أما في الحقيقة هي حاجات طبيعية.
وهو من علامة التبويض اللي ما يلزمش تخاف منهم. الزوز هرمونات هاذم هوما اللي يخليو المرأة عايشة في فرحة
وتبدا عندها إفرازات زايدة اللي هي حاجة عادية علخر خاطر البدن يعرف اللي كي يبدا تبويض يعني لازم يكون فما حبالة وهكا يحضّر أرضية ملائمة بش تصير حبالة اللي هوكا الإفرازات المهبليّة الزايدة.
الإفرازات هاذوكم يعاونوا على صعود الحيوانات المنوية بش تصير حبالة ومالحاجة هاذي نجموا نفهموا في الحقيقة شنوا يصير وقت الحيض ،وقت البويضة متلقاش الحيوانات المنوية وميصرلهاش إغصاب، البدن بش يفهم اللي مافاش حبالة.
الرحم اللي قعد يتكون ويتطبن بالباهي بش يشد الحبالة وقتها يصيرلو انهيار واللي هو الدم اللي يهبط عليك.
الاستروجين والبروستوجين بش يطيحو زادة والبدن بش يضطرب والهرمونات اللي كانوا عايشين في فرحانة،
في لحظة بش يمشيو وهكا يتفسّر إضطراب المزاج اللي يصيرو للمرأة وقت الحيض.
