شنوا ناكلو في السحور بش نحسو بالشبع؟
السحور من أهم الوجبات الرمضانية و هو وجبة أساسية بش نقاومو الصيام, يعطينا الطاقة و يخلينا في نشاط و حيوية على طول النهار.
و فترة السحور تبدا مالافطار حتاكش لوقت الامساك و الأفضل انو نخليوهم لاخر وقت.
أحسن وقت للسحور ديما كي يكون اخر وقت
اخصائية التغذية أميرة دغمان
علاش لازمنا نتسحرو؟
أطباء التغذية ينصحونا نتناولو وجبة السحور لأنها :
1/ تعطي للبدن القوة و الطاقة الكافية للصيام و هكا منحسوش لا بالتعب و لا الارهاق في النهار.
2/ تحافظ على ثبات مستوى الجليكوز في الدم و يخلينا مانحسوش بالصداع و الدوخة.
3/ عدم الشعور بالعطش في حال شربنا كمية كافية من السوائل و الخضر.
شنوا أحسن حاجة ناكلوها وقت السحور؟
“الحليب و مشتقاتو يزيدونا في نسبة الماء في البدن” اخصائية التغذية أميرة دغمان
- التمر و الخضر و الفاكهة هي من أحسن الحاجات الي ينجم الصائم يتناولها في السحور متاعو، بالطبيعة مع شرب كمية كافية من السوائل
- نجمو نتناولو وجبة فيها الكربوهيدرات المركبة الغنية بالألياف كيما الخضر و الفاكهة و خبز القمح الكامل بش نحسو بالشبع كامل النهار و ما نجوعوش فيسع.
- خبراء التغذية ينصحونا زادة بتناول أطعمة تحتوي على البروتينات كيما الحليب و مشتقاته و البيض.
- تجنب الأطعمة المالحة و الحارة في فترة السحور لأنها تعطي شعور بالعطش.
- ماذابينا نبعدو على ماهو سكريات و ماناخذوش مشروبات غازية أو كافيين.
و مالوجبات لي نجمو نتناولوهم في السحور أخصائية التغذية أميرة دغمان تقترح علينا : خبز و جبن و بسيسة و درع و مسفوف.
هذاكا علاش ما تخليوش وجبة السحور تفوتكم و لو بشربة ماء و كعبتين تمر لأنو يحتوي على الفيتامينات و الحديد و البوتاسيوم و البروتينات و خاصة السكريات الطبيعية النافعة للجسم.
ثرية الريماني
