شنوا منافع زريعة الكتان؟
أصل زريعة الكتان من نبتة الكتان اللي يوصل طولها حتى لمترو ، الزهور متاعها لونها أزرق والبذور بنيّة.
وتتزرع النبتة هاذي من شرق البحر المتوسط حتى للهند وفي أوروبا زادة.
1-تحمي من الأمراض
زريعة الكتان فيها أحماض أوميغا 3 الدهنيّة اللي هي تعاون بش تحسّن من عمليّة الهضم وتقلّل مالامساك.
وتساعد زادة الزريعة هاذي إنها تخفف من نسبة الكوليستول في الدمّ وننقصّ في نسبة الإصابة بمرض القلب.
فما أشخاص يشريو زريعة الكتان مرحيّة ويزيدوا منها مغرفة كل يوم للماكلة متاعهم .
2-فوائد تجميليّة
من المنافع الأخرى لزريعة الكتان إنو تنجم تخرّج منها جل تستعملوا بش تقوم بالعناية بوجهك وشعرك.
أول حاجة تحط بذور الكتان وتزيد علاها الماء في إناء وتخليهم يغليو 10 دقائق وانت تحرّك وفي الأخير تتحصّل على مزيج جلاتيني بعد ما تصفيه.
تنجم تستعمل الجل هذا على الوجه بش يعاون على ترطيب البشرة ويحميها من الجفاف.
وتنجم زادة تستعملوا ماسك للشعر قبل الاستحمام خاطر يعاون على التكثيف.
رانية رزيڨ