تعرف على الشخصية الانطوائية
فما أشخاص يحبذو الهدوء والانعزال ويحبو يقعدو بعاد على الضجة والزحمة فهل هاذي حاجات تكفي باش نصنفو الناس هاذم انطوائيين ؟ وهل انو الانطوائية مشكل نفسي؟
سلط علم النفس الضو على ملامح الشخصية الانطوائية وتصنيفها في الستينات من القرن العشرين وأوضح العلماء انو الفرق بين الشخصية الانطوائية والشخصية الاجتماعية في مصدر الطاقة متاعهم.
الشخص الانطوائي يحس روحو خير وقت يلقى جو هادئ ويكون بعيد على التجمعات أما الشخص الاجتماعي يحب يلقى جو حيوي يزودو بالحيوية وين فما تجمعات بشرية.
لكن نجمو نلقاو الزوز شخصيات مجتمعين في نفس الشخص
“إن كل شخص لديه جانب انطوائي وجانب آخر انبساطي، إلا أنه دائما ما يغلب جانب ما على الجانب الآخر”
عالم النفس السويسري كارل يونغ
على أذاكا باش نزيدو نتعرفو على صفات أخرى من الشخصية الانطوائية
الشخص الانطوائي:
عندو محيط ضيق من الأصحاب والمقربين
يفضل الكتيبة على الكلام ويحب ياخو وقتو في التفكير
يركز على نشاطو الداخلي ويلقى راحتو أكثر مع روحو
مراقب جيد وقادر على قراءة لغة الجسد والعيون
ميحبش يعبر على سعادتو
يلقى صعوبة في المبادرة باش يطلب والا يحكي في حاجة
يتجنب المواقف الي تحطو في مواجهة مع أشخاص أخرين كيما الخلافات والعرك
الشخص الانطوائي شخص عادي لكن فقط مايحبش الاختلاط بالناس برشا وبعيد على التسميات الشايعة بين الي يسميها شخصية معقدة أوحشامة,
الانطوائية ماهيش مشكل نفسي وأصحابها يمثلو 30% من مجموع الناس
“قوة الانطوائيين في عالم لا يتوقف عن الكلام”
سوزان كين مؤلفة كتاب الهدوء
هدوء الشخصية الانطوائية مايعنيش انو مستوى تفكيرها أواحساسها ضعيف عندها وتفتقد لحس الفكاهة بالعكس هي تخزن أفكارها وضمارها وتعرف وقتاش تبوح بيه.
اسلام النفزي
