تعرفشي قطوس النفاس والا اكتئاب مابعد الولادة ؟
اكتئاب ما بعد الولادة والا كيما نسميوه بالتونسي قطوس النفاس, هو اضطراب نفسي يصيب 15% من النساء حول العالم والنسبة هاذي ترتفع أكثر في الدول النامية, وإذا ما يتعالجش الاضطراب هذا فإنو ينجم يبقى مرافق المرأة طول عمرها كيما ينجم يصيب الاضطراب هذا الرجال حسب ما أكدتو “لإنجح التونسية” الأخصائية النفسية “ايناس بن سليمة”.
أعراض إكتئاب ما بعد الولادة
علميا أعراض الاكتئاب هذا تبدا في الظهور بعد ثلاثة أيام من الولادة وقت يكثر عند الأم البكاء,زيادة النوم,نقص الماكلة, خوف زايد ,كثرة الأفكار السلبية ورفض للصغير. كيف تطول مدة ظهور العلامات هاذي عند الأم فهي مصابة بإكتئاب ما بعد الولادة.
عند الرجال الاعراض تكون خفية أكثر ,يولي يميل أكثر للعزلة أو الخروج من الدار,يتجنب الكلام مع الناس والتجمعات وعندو عصبية زايدة.
أسباب إكتئاب ما بعد الولادة
اكتئاب ما بعد الولادة ينجم يكون ناتج على حالة اكتئاب تعيشها المرأة من قبل ومع وقت الولادة تصير حالة متع تفريغ للمشاعر بسبب تراكمها. كيما ينجم يكون السبب خلل أو اضطراب هرموني على خاطر الوظائف الجسدية كأم مازالوا جدد عليها.
من الأسباب الي تزيد تعمق الاكتئاب هذا هو الإحساس بالذنب عند الأم وقت ما تعرفش تتعامل مع صغيرها والا وقت تلقى تدخل كبير من العايلة في تربية صغيرها.
بالنسبة للرجال الاسباب في الغالب مربوطة بالحالة النفسية متع زوجتو اللي تنعكس عليه والا بسبب التفكير الزايد في المسؤولية اللي ترافق ولادة الصغير.
العلاج
مهم برشا أنو نعالجو اكتئاب ما بعد الولادة خاصة في بداية ظهور أعراضو عند الام على خاطرو يأثر على الحالة النفسية للطفل وينجم يوصل لإنتحار الأم أو قتل صغيرها.
العلاج يكون في الأشهر الأولى متع الولادة بالدوايات والفيتامينات و العايلة زادة عندها تأثير كبير برشا في عملية العلاج خاصة الزوج.
باش تعرف أكثر تفاصيل على اكتئاب ما بعد الولادة, تفرج في الفيديو.
سارة البلومي